PRIMEIRU-MINISTRU TAUR MATAN RUAK MANIFESTA SOLIDARIEDADE NO KONDÉLENSIA BA VÍTIMA DEZASTRE NATURÁL Dili, loron 4 fulan-abril tinan 2021 – Relasiona ho dezastre naturál ka udan bot ne’ebé akontese iha domingo ne’e, ne’ebé hamate komunidade no infraestrutura barak mak rahun. Ho ida ne’e Sua Eselénsia Primeiru-Ministru, Taur Matan Ruak ohin manifesta nia solidariedade no kondolénsia ne’ebé klean ba família ne’ebé lakon sira nia ema kauza hosi dezastre naturál ida ne’e. Xefe Governu deklara: “Ha’u-nia laran-triste tebes wainhira haree dezastre naturál ka udan bot iha ne’ebé hamosu estragus maka’as no halakon komunidade nia vida. Aproveita momentu susar ida-ne’e hakarak fahe ha’u-nia sentimentu solidariedade ba vítima sira no família vítima sira-nia sofrimentu”. Primeiru-Ministru hatutan: “Hodi Governu no ha’u-nia naran rasik hakarak hato’o ha’u-nia solidariedade no kondolénsias ne’ebé kle’an ba família matebian sira ne’ebé mak sofre hosi inundasaun ida-ne’e”. “Ikus, ha’u nia orasaun hamutuk ho vítimas no família sira. Ha’u dezeja forsa iha tempu susar ida-ne’e no hein katak ita-hotu sei ultrapasa hosi sofrimentu ida-ne’e no Governu sei halo esforsu hotu hodi ajuda família sira ne’ebé sai vitima ba dezastre naturál ida ne’e”.

1. HOTU/MGPM