Tetun: 𝙈𝙊𝙋 𝙋𝘼𝙍𝙏𝙄𝙎𝙄𝙋𝘼 𝙎𝙀𝙍𝙄𝙈𝙊𝙉𝙄𝘼 𝙀𝙉𝙏𝙍𝙀𝙂𝘼 𝙉𝙊 𝙄𝙉𝘼𝙂𝙐𝙍𝘼𝙎𝘼𝙐𝙉 𝙍Ó 𝘽𝙀𝙍𝙇𝙄𝙉-𝙍𝘼𝙈𝙀𝙇𝘼𝙐

𝘿𝙄𝙇𝙄, 20 DEZEMBRU 2021: S. Exa, Ministru Obras Públikas (𝙈𝙊𝙋), Arq. Salvador Eugénio Soares dos Reis Pires, partisipa serimonia entrega ‘Hand Over’ ró Berlin-Ramelau husi Governu Alemáña ba Governu Timor-Leste no inagurasaun ba Ro refere iha Portu, Dili. Iha intervensaun Sr. Primeiru Ministru hatete, partikularmente Ró Berlin-Ramelau nia prezensa hanesan prezente boot ida ba populasaun Oekusi no Atauro, maibé einjeralmente sai mós prezente boot ba populasaun iha Timor laran tomak. Iha oportunidade ne’e, Sr. Primeiru Ministru, kumprimenta liuliu ba ekipa téknika APORTIL nian, ne’ebé, iha jestaun di’ak ba projetu konstrusaun, kumpre ona ninia misaun ho forma ezemplár, ho kontratu inisiál ne’ebé asina ona husi Governu, iha fulan-maiu tinan 2019. Xefe Governu mós aproveita manifesta lori Governu no Povu Timoroan nian naran, hato’o agradesimentu ne’ebé kle’an ba ita-nia ko-finansiadór, Governu Alemaña, liuhosi ninia Banku Dezenvolvimentu Alemaña (KfW), ne’ebé fó apoiu euro millaun 7.8 esensiál ba konkretizasaun projetu ida-ne’e. Projetu konstrusaun ró pasajeiru nasionál daruak depois de ró Berlin-Nakroma ne’e finansia hamutuk husi Governu Timor-Leste no Governu Repúblika Federál Alemaña nian. Berlin-Ramelau konstrui iha Xina, husi empreza Armadora husi Olanda ho naran Damen Shipyards ho nia luan metru 16, kaladu metru 3,3, naruk metru 67,3, konvés ho aas metru 4,8 no sei atinje velosidade másima nós 10 to’o 12. Ró foun ne’e sei troka Nakroma no iha kapasidade ida atu tula ema 380 resin.

Iha serimonia entrega no inagurasaun Ró Berlin-Ramelau ne’e direita husi S. Exa, Primeiru Ministru (𝙋𝙈), Jenerál Taur Matan Ruak, hetan bensaun husi Arsebispu Metropolitanu Dili, Dom Virgilio do Carmo da Silva, partisipa husi S. Exa, Vise Prezidente Parlamentu Nasionál, Sra. Angelina Sarmento, membru Governu, no membru Parlamentu Nasionál, parte FALINTIL Forsa Defeza Timor-Leste (𝗙-𝗙𝗗𝗧𝗟), Polísia Nasionál Timor-Leste (𝙋𝙉𝙏𝙇) inklui konvidadus sira seluk.